【召喚crab lover】啖啖蟹肉蟹黃蟹羔拌麵!!

雖然已過大閘蟹嘅當造季節，但依然有顆食蟹嘅心，所以特別搵咗呢間專食蟹嘅Sexy Crab，真係聽個名都已經夠哂吸引。

 

話明去Sexy Crab食飯，咁點可以唔叫招牌菜Sexy Crab，其實即係蟹肉蟹黃拌麵，入面包咗2款蟹黃、1款蟹羔、一款蟹肉，而且仲配有特製豉油同蟹醋，鍾意食蟹嘅朋友真係唔可以錯過～拌麵麵質煙韌彈牙，蟹嘅份量亦都充分沾滿每條麵，不過可能因為想突出蟹嘅鮮味，所以拌麵同醬汁口味比較清淡。

 

而偏向重口味嘅朋友就可以試吓特濃蟹粉石鍋拌飯，石鍋拌飯嘅飯焦配上特濃蟹粉，真係令人好滿足，如果驚太膩仲可以加$38加配蟹粉黃魚濃湯。

 

另外想推薦嘅有蟹粉黃魚餛飩同蟹粉煙薰鴛鴦溏心蛋，前者每隻餛飩都有濃濃蟹粉，但配上黃魚濃湯，更加食到蟹嘅鮮味，而蟹粉煙薰鴛鴦溏心蛋上枱時打開蓋就有煙霧彌漫嘅效果，打卡之餘亦十分開胃。

 

整體嚟講，雖然價錢偏貴，但作為蟹迷就食得好滿足，不過餐廳座位比較少，而且無得訂位，想食嘅朋友記得早啲去啦！

 

上三兩

尖沙咀梳士巴利道18號 K11 Musea 4樓 401A號鋪