【廣東歌】鄭中基被低估嘅5大歌曲 你又識唔識得晒？

 

今時今日認識鄭中基嘅年輕人，多數都係因為佢嘅電影，例如早幾年嘅暴龍哥令到後生嘅一輩都識佢。但相信大家都知道，其實鄭中基係由歌手出身，而近排佢先開完演唱會，除咗最hit嘅無賴、你代我哭等等，仲有好多必聽好歌你未必識！不如同大家一齊認識下鄭中基鄭中基被低估嘅5大歌曲！

1.《搬屋》

搬屋係鄭中基第一首嘅廣東歌，講嘅係同愛人分手之後決定搬出大家曾經共住嘅愛居。「搬出這天地，正式跟戀愛分離」就正正講出咗兩個人分手之後嘅結果，「掉在地上的衣服，也像廢墟」直接寫出咗愛人走咗之後自己喺屋企嘅頹廢，如果你都有咁嘅經歷都應該相當有共鳴！不過呢首歌嘅曲風一聽就知係90年代嘅風格，有一種古老嘅味道，而家後生仔就可能要熟悉下呢種味道喇！

2.《Valentine》

Valentine係電影《煞到你》嘅中文主題曲，用普通話演唱。歌詞係表達暗戀時對對方愛慕之情同寫出見到佢就面紅、心跳加速嘅感覺。而呢首歌輕快嘅旋律就好似當我地見到暗戀對象時嘅興奮情緒，「我願意守護著你永遠不受傷害，請你給我一個機會去愛」就直接講出咗想同對方講嘅對白，下次你都有對象，就偷偷地Send呢首歌畀佢聽啦！

3.《One More Time》

呢首歌係改篇自日本歌手山崎將義嘅《One More Time, One More Chance》，當初睇完日本動畫《秒速五厘米》之後知道主題曲《One More Time, One More Chance》有廣東話版本，所以就即刻去聽！首歌都係講緊同愛人分開幾年之後嘅淡淡哀怨，「原來共你已分開匆匆數年，竟發現我到這天走不遠」、「我與你不覺路遠，我與你祇覺熱暖，仍然能纏綿渡過飄泊歲月乍看不見」，冇好悲天憫人嘅要生要死，只係單方面無限FF同返對方一齊，由鄭中基把聲唱出呢種淡淡慘情歌真係Perfect！

4.《做夢太早》

《做夢太早》收錄喺2003年推出《唔該救救我》嘅專輯中。歌詞講述另一半唔甘心留喺自己身邊，想尋覓一個比自己更好嘅人。其中一句歌詞「環境差，你未熱愛這地牢，明天將攀到更高」正正係表達緊呢首歌嘅中心思想。「總說人望向高處，沒有錯」雖然好無奈，但亦接受」、「危樓我也修補，花氣力，你不屑望到」就算再努力去修補，對方都決意離去。相信呢首歌係好多情侶嘅寫照，因為對方唔甘心，而自己嘅努力就畀對方完全抹殺，有共同經歷嘅你一定聽到流眼淚！

5.《2月3日》

呢個日子有咩特別？其實就係楊千嬅生日。當年鄭中基為咗追楊千嬅，就親自作曲寫起咗呢首歌，入面嘅歌詞亦都相當直接向女方表達愛意。「願望就在二月三日你的生辰，向全世界宣佈，妳是我的皇后」、「願望就在飄蕩多年以後，把我的心留在你的眼眸」。估唔到原來鄭中基先係世界上最浪漫嘅男人呀！

今時今日好歌手愈嚟愈少，實在唔想大家唔識呢個咁高質嘅佢！其實鄭中基仲有好多一定要識嘅歌，想聽下廣東歌嘅你就快啲進入鄭中基嘅世界啦！