【知我咩料啦】細數193@Error出道三年爆笑串嘴史 原來曾經想入TVB？同TVB有不解之緣？

 

對於TVB高層曾志偉受訪時表示ViuTV收視得4點，題材偏門，認為ViuTV只可以同旗下J2台比較。其後Error成員193對住傳媒隔空明串TVB，反擊表示「佢哋俾老嘢睇㗎嘛，做好自己就得，收視得幾百部電視機，我哋不嬲唔理。」，又話「J2 係做咩㗎？係咪四十幾歲仲話後生仔傾偈嗰個。」大膽直率嘅言論引起網民熱議，更加有唔少人力撐佢「只係講事實」、「敢言」、「轉數快」，被封為「娛樂圈清泉」。

其實如果有從《全民造星》開始就留意佢嘅觀眾，一定好清楚193嘅形象不嬲都係「有嗰句講嗰句」加上騎呢搞笑㗎啦。唔講唔知，原來193以前真係報名參加過TVB藝員訓練班，不過就選唔中，之後就成為咗Error成員，由2018年正式出道開始，已經做過唔少出位嘢，當中有唔少都關TVB事㗎喎！

#去TVB電視城門口踩場

兩年前ViuTV節目《肥仔大冒險》中，身穿超搶眼桃紅色外套嘅193去咗TVB電視城踩場，向保安哥哥自稱明星，要入去表演唱歌跳舞，令保安哥哥一度懷疑：「咁奇怪？」，193為咗說服保安，仲喺佢面前表演《前傳》，最後盲闖不遂就由組員阿Dee同肥仔夾手夾腳抬佢走，場面十分搞笑。

相片來源：ViuTV Youtube Channel

#台上自嘲兼疑似暗串星夢藝人

Error出席《新人大熱唱2019》喺台上被司儀問到平時中意咩風格嘅音樂，193就講咗一番好耐人尋味嘅說話，佢笑言「我就偏向啲歌有電視味同走音味。」就咁聽好似係自嘲，但其實同場都有TVB藝人兼星夢歌手林穎彤，星夢嘅作品又...唔知193係咪暗串緊TVB呢？

#當面揶揄花姐唔識做經理人

另一個同樣好受歡迎嘅ViuTV節目《花姐ERROR遊2》中，製作組安排193同花姐一齊幫隻咁啱都叫阿花嘅犀牛擦背，193於是就乘機笑花姐肥，又暗指佢唔識做經理人，成日丢低其他藝人，不禁令人聯想到佢係咪想講Mirror同Error嘅待遇好唔同，串花姐偏心，激到花姐忍唔住問：「我丢低邊X個呀？」，不過193意識到花姐堅嬲之後都即刻氹返花姐話佢其實好重要嘅~

#新年最怕被親戚問姜濤係咪處男

上年新年期間Error出席活動嘅時候被記者問到最怕拜年嗰陣親戚問咩問題？其他成員都關心逗利是嘅問題，而193就話佢最怕親戚問佢姜濤係咪處男，仲話：「我點知啫？大佬，我又未試過。」引到記者朋友都笑出聲。