《嗰日呀姐辭職，我買咗碗譚仔三哥大辣畀自己》

 

《嗰日呀姐辭職，我買咗碗譚仔三哥大辣畀自己》

 

我諗好多人都好想成功，想喺某一方面出人頭地，又或者畀人記得自己。不過，我天生就係一個好普通嘅內向男仔，好似喺小學中學咁，老師都只係會記得一啲好叻又或者一啲好壞嘅學生，對於我呢啲冇乜特別成績普通性格又正常嘅4眼仔嚟講，基本上都冇人記得，最誇張嘅係有個呀Sir教咗我7年PE，佢都唔記得我叫咩名。

 

然後，我勉勉強強咁入到大學，勉勉強強入到科水泡科，勉勉強強咁Second Hon畢業，最後，勉勉強強咁......A0 Grad……

 

經歷咗咁多年嘅讀書生涯，我都對自己冇乜期望，唔使人哋記得自己，正正常常咁生活返工，不求有功但求無過已經足夠。

 

之後返咗份工冇幾耐，又到咗做Appraisal嘅時候。其實我都冇期待啲咩，咪又係嗰幾句老套嘢，「返得ok呀冇乜特別呀繼續努力呀」咁囉。

 

點知一坐低，呀姐就同我講咗句嘢，我到而家都好記得。

呀姐：「其實你係一個好特別嘅人」

 

我即刻嚇咗一跳，係唔係想炒我，因為我特別廢呀？

 

呀姐：「唔係，你有好多人都冇嘅特質，就係你不求有功，但求無過。」

 

吓？乜呢個係特質嚟嘅咩？

 

呀姐：「有功真係唔難，有時天份好少少嘅，是但做都可以做到份好嘢。但要做到無錯好難，要做嘢非常小心謹慎先得，呢方面你做得好好，我搵你做嘢都好放心。繼續努力，畀心機。」

 

……

 

呀姐：「畀啲信心自己，其實你淨係爭呢樣嘢。唔好成日諗住自己有咩唔好，又或者，當你覺得自己有啲嘢自己做得唔好嘅時候，你話我聽，我會提返你，你做得有幾好。」

呢一刻嘅感覺，我唔識形容，好開心，但同時個鼻好酸。咁多年以嚟，我第一次發覺，原來畀人重視係咁開心。自此之後，我比起以前更加努力做嘢，而呀姐都畀咗好多機會我，令到我喺事業上有好多發展嘅機會。

 

終於，好老套咁講一句，天下無不散之筵席，呀姐Last Day了。我冇同佢哋一齊喺大食會食Pizza，而係叫咗一碗譚仔三哥大辣。

 

呀姐：「喂呀仔，你要繼續畀心機呀。」

我望一望佢，忍唔住，食咗幾啖大辣米線。

 

呀姐：「做嘢要Keep住好似而家咁，一定會有人繼續畀機會你。」

我冇望佢，繼續食米線。

 

呀姐：「喂，同你講緊嘢呀！」

我成面淚水咁望住佢，

「知啦，食緊大辣流緊眼淚唔好意思望你呀！」

 

呀姐：「好啦，要講嘅講完，加油。」

 

我望一望呀姐，再望一望碗米線。

好彩今日叫咗大辣。

 

點解？因為流眼淚，我可以賴落碗米線到。

喂呀姐，如果你睇到篇文又知我係講緊你，

我想好衷心同你講句，多謝你。