【MIRROR鏡聞版】姜濤紀錄片《答案》最終章 「全副武裝」搭港鐵、行商場、返母校拍攝！自揭中學自卑事跡 姜濤：其實我真係跌得好低

 

請Like我哋個Page：

生活提案事務所 Lifenews HK

姜濤喺舊年11月開始，不定期推出紀錄片《答案》，帶姜糖認識真實嘅佢，《答案》嘅最後一集亦喺琴晚公開。今集最大看點，一定係姜濤戴住Cap帽口罩、全黑裝扮，以「全副武裝」搭港鐵、電車同埋行商場，連佢自己都形容係好奢侈嘅事，大明星果然唔易做。而成名之後，除咗生活有翻天覆地嘅變化，亦令到姜濤有啲「高處不勝寒」。即使連續兩年獲得叱咤大獎，佢仍然自覺「跌得好低」，難以面對外界質疑。

（圖片來源：MIRROR @YouTube）

今集姜濤就重回初心，帶大家重返母校，重遊佢第一個表演嘅舞台，當年青澀嘅姜濤真係好可愛！不過佢都直言，自己所有嘅自卑，同埋童年嘅不自信，都係來自呢間中學。佢自爆當年仲係肥仔嘅佢，每次上游水堂都會企喺泳池隔離，唔會除衫；就連跑步嗰陣望住其他同學，都會覺得好自卑。相信童年嘅經歷，令到姜濤特別在意其他人嘅目光，即使而家成為萬人迷，仍然唔快樂。

（圖片來源：MIRROR @YouTube）

適逢「九胎」《鏡中鏡》喺今個月初「出世」，今集嘅畫面都穿插住《鏡中鏡》嘅歌詞同埋MV拍攝花絮。姜濤亦提到，呢首歌係以自己嘅故事同經歷作為背景，講述自己面對外界聲音，從抗拒逃避，去到反省領悟嘅過程。佢形容自己已經走過低潮，會繼續搵方法同負面情緒共存，同埋更勇敢面對外界聲音，仲叫大家要繼續督促MIRROR，真係好謙虛！

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！