【重量級嘉賓！】 試當真九展開騷慶一週年 古天樂驚喜現身撐場 扮見工大搞Inside Joke!!

 

請Like我哋個Page：

生活提案事務所 Lifenews HK

大熱Youtube Channel試當真琴日連開兩場Talk Show，慶祝Channel創立一周年，大批粉絲下午已經去到九展，買紀念品同埋排隊等入場。為咗報答忠粉們嘅支持，試當真一眾成員除咗準備多個高質表演，更加邀請咗重量級嘉賓撐場，如果想知係邊個，就要睇埋落去啦！

（圖片來源：Instagram @cheukwanchi）

試當真今次總共邀請咗三個嘉賓，第一個就係「古仔」古天樂啦。古天樂一向支持演藝界後輩，今次亦都驚喜現身，喺《Channel需要仔》嘅環節入面，化身打工仔扮見工。佢一登場就即刻搞gag，問大家點解試當真開騷「咁大件事冇人講？」，睇嚟古仔真係跟得好貼！之後佢仲話喺Channel入面，最欣賞嘅女仔係「Locker條女」 Jeannie（吳家忻）。唔知得到古仔加持，Jeannie未來會唔會有進軍大銀幕嘅機會呢？

（圖片來源：Instagram @cheukwanchi）

除咗古仔之外，試當真仲請咗Dear Jane同佢哋一齊合唱《銀河修理員》，點知唱唱下就變咗廣告改編歌《外賣修澧賢》，現場仲有大量印有Deliveroo優惠碼嘅紙條從天而降，咁特別嘅橋真係試當真先諗得出！最後，ToNick亦都登場同「MC $oHo & KidNey」豪哥（蘇致豪）同許賢合唱《跌嘢唔好搵》，將全場氣氛推至最高點！今次場騷咁精彩，小編已經期待緊佢哋兩週年開騷，希望到時大家都會搶到飛啦！

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！