【學習生活】 《5大溫書技巧》

 

有啲人聽住歌溫書好入腦，有啲人就覺得聽住歌會溫唔到書！到底點解會有咁嘅差異？趁住DSE考生而家考緊公開試，同埋大學生都進入Final嘅階段，一於分享下啲溫書冷知識畀大家啦！

1.聽音樂溫書唔係問題，聽啱音樂最重要

聽歌溫書會專心啲定會心散啲？其實就係睇下你聽咩歌喇！認知行為治療專家Emma Gray指出，唔同音調同bmp嘅音樂都有唔同影響。如果想溫數學嘅話，聽60 - 70bmp就最啱，如果溫英文科，就應該聽50 - 80bmp！

2.打晒喊路？見字即瞓

相信大家都聽過「休息係為咗走更長遠嘅路」。有時死衝爛衝，溫書嘅效率會去到超級低點。呢個時候瞓一個短覺都有幫助㗎，因為大腦喺睡眠嘅時候會開始進行記憶儲存、混合、配對、修改等等嘅過程，並達到學習同記憶嘅目的！所以，瞓覺前溫習背誦型嘅科目，可以直接地將溫習內容轉化為長期記憶。

3.尋找伙伴的故事！開Cam溫書

有個伴一齊溫書，有人一齊努力可以令你更加有動力去溫習！不過，有時同朋友一齊溫書反而會掛住傾計好容易分心！韓國嘅青少年就好輕上網識一個陌生人然後一齊開Cam溫書，咁就可以又有人陪又唔會掛住玩而分心啦！

4.就算幾攰都要記得做運動

可能你會諗，溫書都冇時間仲邊有時間做運動！不過，哈佛研究指出，每日做一節20分鐘帶氧運動係可以提升你嘅專注力同埋記憶力。只要20分鐘就可以提高成個溫書效率，相信你識得計呢條數啦？

5.無限FF！幻想未來

呢個方法唔係嚟自咩專家，而係嚟自我自己！想當年我考公開試溫到冇心機嘅時候，就會上大學網頁睇下人哋大學有咩讀有咩玩，然後畀個動力自己努力讀書入大學玩到盡！而上到大學要考Final，我又會睇下有咩潮物，畀動力自己讀好書賺多啲錢買晒佢！同自己講只要呢一刻肯努力將來就有回報，可以令自己更加有動力！

不過每個人讀書都有唔同方法，唔可以一本通書睇到老，最緊要都係搵到自己嘅方法！你又有冇啲特別嘅溫書技巧同經歷Share畀大家？