香港版日本隱世老咖啡店！深水埗新開日式復古風Cafe！推介招牌甜品天使之鈴！

最近去深水埗都會見到好多小店大排長龍，當中有唔少係近幾年先開嘅文青Cafe。而今年又有新人加入戰團！睇店名就知「楓子珈琲」走日式懷舊風，一行入去就覺得自己去咗東京近郊嘅隱世小店！滿滿嘅懷舊陳設，加上深海藍牆身，真係好有日式老咖啡店感覺。

其實連個門口都超有Feel，木質材料配大玻璃窗，相信少女們可以企門口影足成粒鐘。（都係要提醒大家，影相還影相，唔好騷擾到其他食客！）

依間Cafe主要提供日式主食、輕食以及甜品，但係小編就最最最推薦佢哋嘅「天使之鈴」！

天使之鈴其實即係法國經典甜品「可麗露」，而楓子珈琲有提供雲呢拿同楓糖兩種口味。食落外層脆、內鬆軟，口感超豐富！不過提一提大家，天使之鈴係每日限量發售，手快有手慢冇！

另外仲想推介「櫻花豆腐芝士蛋糕」、「斑蘭咖央椰子戚風蛋糕」等人氣甜品，但由於篇幅有限⋯大家都係自己去試啦！

最後提一提大家，一定要試店家嘅咖啡！為咗配合楓樹主題，竟然連咖啡都加入咗楓糖！苦苦嘅咖啡加上甜甜嘅楓糖，係一種完全未試過嘅好滋味！

 

店家資料

楓子珈琲

地址：深水埗楓樹街5號

營業時間：1200-1900 (TUE-SUN)

 

圖片來源：楓子珈琲Instagram