【香港月餅特集2021】5間小眾品牌特色月餅推介！威靈頓牛柳月餅/月餅型慕絲蛋糕/立體牡丹花手工月餅都有！

 

請Like我哋個Page：

生活提案事務所 Lifenews HK

又到8月，唔少人都開始訂月餅迎接今年嘅中秋節。有好多品牌離不開都係推出奶黃口味、冰皮或者傳統款式月餅，雖然好食但係難免會有啲悶。以下係小編為大家搜集咗5間小眾品牌推出嘅特色月餅，包括有全港首創嘅威靈頓牛柳餡月餅、月餅造型慕絲蛋糕、全人手工製造嘅立體牡丹花月餅都有，送禮體面得嚟又有創意，自己買返去賞月又有一番風味。

1.  Be Bakery 牡丹花手工唧花月餅

呢間堅持選用本地食材嘅烘焙IG小店嘅Be Bakery，其實喺上年已經推出咗呢款《採月》月餅禮盒，今年再接再厲，呢款禮盒有大紅大紫牡丹花手工唧花月餅2件，餡料係白蓮蓉棗泥蛋黃，喺低溫下烘焙帶出白蓮蓉獨有嘅香氣，內層用紅棗泥代替傳統豆沙餡，甜度適中。另外有2件台式鬆脆蛋黃酥組合，內餡包住黑芝麻蓉蛋黃，酥皮仲係傳統人手開酥技術製成，有層層酥脆嘅口感。

官方詳情：IG@be.bakery.hk

2. Phoebe's Kitchen 全港首創威靈頓月餅

威靈頓月餅嘅概念係來自一位本地女大學生Phoebe，據說佢喺上年疫情下嘅中秋節炮製迷你版威靈頓牛柳俾屋企食，因而靈機一觸將威靈頓牛柳變成月餅，推出之後反應熱烈，今年再次推出。呢款月餅餡料唔止有威靈頓牛柳，仲有巴馬火腿、白磨菇、冬菇同埋鵝肝，加入芥末、黑松露醬、黑胡椒、香草、蛋黃同埋酒混合嘅醬料而製成。記得呢款月餅要放入4度雪櫃解凍過夜，需要入焗爐或氣炸鍋焗製。

官方詳情：IG@xphoebeskitchenx

3. One Lick Cake 月餅型慕絲蛋糕

呢間One Lick Cake IG甜品小店，由一位對烘焙充滿熱誠嘅前空姐主理，今個中秋節佢特別研發4款口味嘅月餅型慕絲蛋糕。據說店主唔鍾意食月餅，發覺其他人都有同感，所以靈機一觸將慕絲蛋糕變成月餅形狀，迎合呢班唔鍾意食月餅嘅吃貨。全新口味嘅月餅造型慕絲蛋糕一共有4款口味，包括：原味芋泥、抹茶紅豆、焙茶栗子、黑芝麻配黑芝麻蓉。自問同樣年年食月餅食到悶，呢款月餅蛋糕都可以係一個選擇。

官方詳情：IG@onelickcake

4.  香菜先生「香菜芫茜麻糬台式月餅」

自問芫茜控都有聽過香菜先生呢個台灣品牌，今年佢哋嘅芫茜月餅改用台式月餅皮，餡料用咗大量新鮮芫茜、自家香菜乾同埋香菜粉等等，聲稱比上年更重芫茜味，最重要嘅係月餅裡面包住一粒麻糬，鍾意重口味嘅你不妨試下。

官方詳情：IG@mr.coriander.hk

5.  小麥芽Veggie's Mart 純素月餅

來自香港素食辦館嘅小麥芽為一班素食者推出4款口味嘅純素月餅，分別有金橘果仁、藍莓玫瑰鷹嘴、馬來西亞文冬薑鷹嘴同埋元肉黑芝麻鷹嘴豆蓉口味，呢4款口味嘅純素月餅分別有獨立款同埋雜錦組合買。自問驚食月餅食滯嘅朋友，純素月餅都係一個選擇。

官方詳情：https://www.veggiesmart.com.hk

圖片來源：IG@be.bakery.hk、@xphoebeskitchenx、@onelickcake、@mr.coriander.hk、veggiesmart.com.hk

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！