【賣「咪跣」賣到上市 譚仔日賣米線8萬碗】

 

譚仔國際向聯交所遞交上市申請，除了招股書似MENU之外，當中一段「譚仔」與「三哥」湯底口味比較亦令人注目。「譚仔的湯底通常口味較清淡、鮮美，有一種溫暖的闔家氛圍；三哥的湯底通常口味較濃厚，特色是蓬勃年輕、活力四射。」唔知一眾譚仔達人又認唔認同？

 

睇返招股書資料，截至去年底止9個月(4至12月)，譚仔國際收入接近13億元，賺2.3億元，剔除政府補貼及租金優惠就賺9,300萬元，按年跌46%，毛利率高達73.1%，期內賣出米線2,237萬碗，平均每日賣超過8萬碗，人均消費則由前年60.6元降至58.5元。

 

值得留意係根據資料，「譚仔」喺香港開新店，只需一至兩個月就可以達致收支平衡，投資回本期亦只係介乎6至19個月，真係恨死一眾餐飲同業。

 

以往「譚仔」同「三哥」各有支持者，今次招股書就披露兩者數據。人均消費方面，「譚仔」人均消費58.5元較「三哥」57.6元略高。顧客總數方面「三哥」就佔優有1,125萬人，「譚仔」就有1,111萬人。餐廳總數方面就打和，「譚仔」同「三哥」係香港各有72間分店。

 

而今次上市集資所得，將用作擴大餐廳網絡；新設中央廚房；翻新餐廳及提升經營設備等。